تحت سقف واحد البارت الأول

قصة حقيقة منقولة من صاحبة القصة شخصياً وموجودة ع الواتباد بنفس العنوان.
قضيه تحتاج الى النقاش...!
امي منحرفه...!
قصه من ارض الواقع...!
الجنه تحت اقدام الامهات....!
لكن امي لا......!
............................................
راح أبدي بدون مقدمات

اني فاطمه قصتي تبدي من عمري 11 سنه.... مواصفاتي.. حنطاويه وعيوني واسعه وخضر وشعري اسود اني اشبه امي كلش نسخه منها وهذا الشي خلاني اكره روحي والناس هم تكرهني اني احب ابويه حيل بس قبل لا اكتشف معدن  امي اني ما احبها لان تعاملني معاملة جافه وكأنما مرت ابويه مو امي حتى رادت تبطلني من صرت بالخامس ابتدائي بس ابويه ما قبل وهم امي متحترم ابويه ابد وابويه يجادلها بس لمن يحتد الجدال يسكت ابويه... ويرجع يعتذر وفوكاها امي ماراضيه... شكد ناكره للنعمه... لتكولون هاي امج مهما يكون ميصير تحجين عليها حفظت هذا الكلام بعدكم متعرفون امي يمكن من تعرفوها تكرهوها اكثر مني...
وقت الغداء#... طبعا ابويه يشتري من المطعم اذا حظرت جناب الام متكدر تطبخ لاسباب مجهوله وابويه كلش يحب امي وميردلها طلب....
نبذة عن حياتي ويه امي

امي..فاطمه كلبه تعالي....
ابي.. ميصير تغلطين هيج هذا اسم فاطمة الزهراء (ع) ميصير هيج تغلطين..
امي.. ادري
فاطمه.. هاا شكو
امي.. باوعي عدل ولج لا افكس عيونج حقيره امشي تزقنبي....
ابي.. لج  لتحجين وياها هيج هيه شمسويتلج...
امي... اي ديله خلي تولي اكو وحده تباوع لامها هيج..
أبي.. أي بس على كيفج متسوه تره
...........................................

فاطمه.. كعدنه تغدينه وخلصنه راح ابويه ينام بس امي ركض راحت على الموبايل تسولف وتضحك اني رحت اسويلها جاي مثل مارادت.... ومن دا اطب سمعتها تضحك بصوت عالي... اني وكتها طفله وصار عندي فضول اسمع لان ادري اذا طبيت رأسا تسد الموبايل ماعرف ليش..ظليت اسوي حركات تجسس وسمعتها تكول..

امي.. حبيبي اروحلك فدوه حياتي مو هسه تجي اصبر سنه سنتين،، اخلص من العله اللي عندي وشتريد اني حاظره

فاطمه طبيت بسرعه وكلت.. ماما ويه منو جنتي تحجين...؟

امي.. نعاله شجابج هنا خلي الجاي وامشي ولي بأي حق تسألين..

فاطمه.. المن تكولين حبيبي اذا بابا نايم وانتي ماعندج اخوان.. صح جنت طفله بس هذا مو معناه ما افتهم،،   ...

نوب اجت لزمتني من شعري وضربتني  وتكول انتي شكد سافله ولسانج طويل ظلت تضربني لمن احس جسمي تكسر رحت لبابا ابجي...

فاطمه:بابا... الحكني.. اشهك واحجي بكلمات متقاطعة

ابي.. ولج شبيج..

.. ماما. جذابه.. والله ماشفت ام تجذب مثلها
قاطعني صوت امي وهي تكول

.. ها ولج حقيره تتجاوزين على امج وتضربيها متستحين ابو فاطمه حبيبي شايف بنيه بعمرها تضرب امها..

ابي.. شنو فاطمه ضربتج صدك تحجين..

امي كامت تبجي بدموع التماسيح وكالت اي والله شنو متصدكني مع الأسف

- شهكت.. هاي شوكت بابا جذابه لتصدكها والله تجذب اصلا اني سمعتها  بأذني ...
بعدني ممكملة كلامي
واجت  خلت  ايدها على حلكي وضربتني راشدي
امي.. ولج متستحين تكولين على امج جذابه هيه هاي تربيتي الج نيالي اي والله وهم رجعت تبجي.. والله تعرف تمثل خررب وابويه بس يريد حجه حتى يصدكها واني واكعه بينهم..

نوب هم اجه ابويه ضربني راشدي وجرني من شعري

فاطمه..اخخخ بابا عوفني والله تجذب والله لتصدكها..
ابي.. لج انتي شنووو فهميني ماشفت بنيه بهل صلافه بعدج بطول النعال من تكبرين شسوين

- بابا اسمعني تدري..

- اشششش ولا كلمه انخرسي  بعد مدرسه مترحين وحتى الموبايل اللي واعدتج اشتري الج ماكو الظاهر انتي متستاهلين..

فاطمه رحت بست رجله واتوسل.. كلت ببرائة
- بابا شبيك حباب اي شي ولا المدرسه حباب اريد اصير طبيبة اسنان هذا حلمي والله حتى كاتبه على كل كتبي الدكتوره فاطمه....

ابي.. نجبي وامشي ولي عن وجهي..
ودار وجهه ومشه يريد يطلع من البيت

صرخت.. بابا لا  لا  فدووه لتبطلني هاي اخر مره بعد ما اسويها.. والله بعد ما احجي ولا افك حل كي والله اذا حجيت كص لساني الله يخليك ماريد ابطل

-آخر حجي وياج اذا عتبتي باب البيت رجلج تنكسر..

لزمت ايده بتوسل .. بابا لتروح حباب شتريد اسوي اي شي بس لتبطلني..

اجه لزمني من شعري وسحل للغرفه وسد عليه الباب وقفله بالمفتاح  وطلع..

كعدت ابجي بصوت عالي واشيل الغراض واكسر بيهن حلمي انكسر وابويه اخذ عليه نظره...

وفوك هذا حتى الموبايل اللي جنت احلم بيه حتى اخابر صديقاتي بالمدرسه رااح وفوك كل هذا امي واكفه على جهه ورافعه حاجب وتبتسم... ثنينهم ماعدهم رحمه عذبوني لا ام عده رحمه بكلبها  ولا أبو بيه خير يكدر يميز الصح من الغلط.. واني مجرد ضحية لا أكثر..

بالليل اجه ابويه  فتح الباب وميباوعلي وامي لزمتني على جهه وتكول...
امي.. اسمعي السمعتي اليوم بالموبايل من جنت احجي انسي امسحي من ذاكرتج واذا سمعت انو كايله لابوج اكسرج تعرفين شنو اكسرج اخليج تتمنين الموت ومتموتين..  والله  اشمرج لاي صخل ياخذج واخلص  تره اني كارهتج من يوم حبلت بيج ومن يوم تزوجت ابوج الفكر ابن الفكر..

قصدها تزوجني لواحد من ولد خالته همه 5 اكبرهم عمره 43 واصغرهم 25..

فاطمه ابجي بحركه حتى عيوني كامت توجعني

-اي اي ما اكول والله  بس عوفي شعري عوفيني والله راسي يوجعني..

عافتني وراحت.. 

.. تسريع الاحداث..
بعد ثلاث اربع سنين من هاي الاحداث صار عمري 16 سنه شبعت كتل من اهلي وامي اكتشفت بعدين انه هيه تخون ابويه
يتبع..


مريم التميمي

البارت 2
اكتشفت انو تخون ابويه وكل خميس ابويه عنده شغل متعب بهذا اليوم يطلع ب 7 الصبح وميرجع اله ب 12 وكل خميس امي تدخل شاب للبيت تكعد تسولف وياه بالاستقبال اليوم كله وضحك وسوالف..

وبعدين تجي تدخلني للغرفه مالتي وتقفل عليه الباب وتهددني اذا حجيت تكتلني وتكتل ابويه واني من خوفي على ابويه اسكت لان صدك اخاف منها وهم من اكول لابويه ميصدك ويشبعني كتل ونوب تجي امي تملخني واني محد يصدكني....

بالليل رجع ابويه وقررت اكوله وشيصير خلي يصير... رحتله جان يباوع بلموبايل

- اكلك بابا

-هاا
-تدري ماما تدخل شاب للبيت كل خميس والله ما اجذب والله حتى تقفل الباب عليه وتروح...

- انتي بيج جني شي مسويلج سحر وفاقده عقلج.. ولج اتخبلتي شنو هالحجي....

فاطمه كمت ابجي واحلفله ميصدك  اجه ضربني راشدي وطلعني بره...

ياربي شسوي منو يصدكني هسه حتى تلفون ماعندي اخابر اي واحد واكوله حتى تلفون امي وابويه بيه رمز ليش هيج تسوي امي ابويه بشنو مقصر والله اول مره اشوف رجال يحب مرته ويقدرها هيج حتى عساس هيه اتزوجته عن حب.... لعد شكد خاينه امي.......

............................................
مرت الايام نفس الحال.... ومحد يصدكني وكالو عليه مخبله ومخرفه لحد ما اجه يوم كلت لازم اتصرف... جان ابويه طالع واندك الباب رحت اريد افتح الباب امي ماقبلت وطلعت بلا حجاب كلتلي دخلي جوه... اني سويت روحي ارتب بالصاله واكنس...

هيه راحت طلعت مشيت على كيف كوه امشي مثل النمله لحد ماوصلت للباب مال المطبخ شفت امي دخلت نفس الشاب..

للحديقه ردت اسمع بس الحديقه بعيده عن الباب مال المطبخ فتجرئت وطلعت على جهه واكفه بزاويه بالطارمه حتى متشوفني شفتهم كعدو وسمعتهم يحجون..

امي.. ايي هسه شنو فكرتك...

-.. عندي اصدقائي اثنين اذا تردين يساعدوني لان اني وياج منكدر... وحدنه.

امي.. زين بشنو نقتله شنو نوع الأسلحة الي عندك وشوكت نبدي..

- بعد يومين..  وهم عندي كومه مسدسات لكل واحد مسدس ها شتكولين وهم حجزت للخارج بنفس اليوم نقتله ونطلع كبل للخارج.. كبل لايحققون

-.. هههه عفيه عليك بس هاي العله اللي
عندي شلون اخلص منها...

-.. منو عله...

-.. هاي الحيه فاطمه...

-.. عادي نقتلها ويه ابوها ونخلص منها

-.. لايمعود صح اني ما احبها بس هم تبقى بنتي...

-.. لعد اذا تعوفيها تفضحج هاي متسكت

-.. هم صدك لعد هاي هيه اللي تريده يصير

.. اني واكفه على جهه ودموعي مانشفن وارجف.. حتى راسي كام يوجعني حسيت بدوخه قويه صدمه وره صدمه مامستوعبه يمكن راح اتخبل صدك الي ديصير فوق الخيال..  رحت ركض حتى امي سمعت حركه دخلت للبيت ورحت ختلت بالغرفه ولزمت تلفون امي وابويه احاول افتح الرمز احاول بهذا وبذاك ماكو طبعا اني عرفت انو امي سمعت كلشي لان حركتي فضحتني وشافتني لمن ركضت ختلت بالغرفه وقفلت الباب بس الحمد لله هذا الرجال طلع..

.. افتحي الباب حقيره افتحي اني اعلمج ولج
فاطمه..  اشهك وابجي بصوت عالي..

- انتي مو ام لا والله مو ام ماكو هيج ام تسوي بزوجها وبنتها حرام عليج هيج تسوين لعد وين رحمة الام وحنانه وييين مجرمه والله مجرمه ليش انتي امي شنوو ذنبي..

امي.. اكلي خره ونجبي هو انتي مال رحمه اذا متفتحين الباب هسه احرك البيت عليج واطلع تره عادي سهله عندي

فاطمه..  عيوني كامت توجعني من كثر البجي كوه  اشوف افتح واحاول بالرمز ماكو يالله شنو هالمصيبه نوب من عصبيتي لزمت تلفون امي وبكل قوتي وعصبيتي شمرته بالكاع اتفلش وصار طحين حتى شاشته اتحطمت.. ظلت امي تصرخ وتدفع بالباب لحد ماحسيت انو الباب هم راح ينكسر حتى جابت شي جبير ماعرف شنو وتركع بالباب خفت حيل وهمزين الله ستر واجه ابويه..
وبعد ماسمعت لأمي حس.
رحت فتحت الباب وسمعت ابويه يتعارك ويه امي لان جايبه بوري حديد وكاعده تريد تكسر الباب وامي تطلع اعذار وابويه يصرخ عليها...

رحت ركض حضنت ابويه وابجي بصوت عالي حسيت بلأمان اللي فاقدته ويه امي... ابويه كال شكو شبيج حبيبتي...
فاطمه.. يابه فدوه لتعوفني ماما راح تقتلنه والله..  ماااجذب والله..

دفعني وظل يصيح عليه وضربني راشدي يكولي شوكت تبطلين خبالاتج...

امي.. حبيبي عوفها هاي مخبله لازم نوديها لسيد يمكن مسويلها سحر..

ابي... ايي هم صدك...

فاطمه.. شكد جذابه اليوم العصر سمعته تحجي  ويه رجااال ليش مصدكني حرام عليكم..

امي ترزل بيه وابويه شبعني كتل مثل كل مره حتى رجلي كوه احركها يكولي شلون تتهمين امج هيج تهمه محد يصدكني.. هو فعلا شيئ لايصدق

من طلعت اجتني امي سحلتني من شعري وتفشر عليه...

امي.. ساقطه بنت الكلب سافله انتي شلون بيج هسه شلون اتحمل منا لمن اكتلج واخلص..

فاطمه..اخخخخ اخخخخ شعري عوفيني  والله راح اوكع  يممه عوفيني دخيلج والله دايخه راسي ديوجعني.

دفعتني من خصري  انضرب راسي بالحايط .. احس رجليه متشيلتي واحس نفسي واكعه من مكان مرتفع وشويه شويه انطفت عيوني  وبعد ماحسيت بشي

...
يتبع...
شنو تعليقكم على هيج حاله وربي القصة حقيقة

..كعدت لكيت روحي بمكان ظلمه وخنكه واحس اكو شي على ايدي احرك ميتحركن ...نوب ما اشوف شي لان ظلمه كلش ظليت اهز براسي واركع راسي بالحايط احس ايدي مربوطه بشي اريد تنفك مدا اكدر نزلت راسي شويه وظليت اعض بإيدي صار بحلكي قماش..

ايدي مربوطه بقماش هيج شي ظليت احاول اجر بهذا القماش واجر ماكو مينفك يالله شنو هالمصيبه

...صرخت بصوت عالي...بابا يممه لحكوني والله اختنكت حسيت الباب انفتح وطب شويه هوه ونور لهذا المكان الظلمه وانفتح الباب كله وطبت امي......! بس للي فاجئني ...!أنه امي من فتحت الضوه لكيت عيونها الخضر ما مبينات من كثر البجي ....!

هاي اول مره بحياتي اشوف امي تبجي من انولدت ولحد هاي هسه يله شفتها تبجي ...اول ماطبت جانت جايبه صينية اكل وياهه خلتها كبالي وسدت الباب وكعدت يمي وهيه ساكته فاطمه...هاي شنو شمسويه ليش رابطه ايدي ابجي واحجي وياه....
ليش انتي هيج قاسيه وماعندج رحمه ليش ليش لييييييش...

امي...اسكتي انتي اسكتي هسه هاي شدتحجي وإني بيا حال تعالي شوفي مصيبتي... فاطمه...شنو من مصيبه بعد اكبر من خيانة زوجج هو انتي كلج مصيبه امي...اي صدك اني مصيبه  لو مانولدت لهاي الدنيا مو احسن...

.ولج طلعت حامل..

فاطمه..شنو ...من منو احجي بسرعه بس لابالحرام ...

امي..لا ولج حقيره...من ابوج... فاطمه....هاااا اي زين لعد وين المصيبه امي...المصيبه توني رحت اخذت سونار لان زادت الأعراض عندي

.....وطلعت بشهر السادس .واني ما ادري.... فاطمه...اكو وحده بشهر السادس ومتدري بروحها وين صايره.

.... امي...اني هملت روحي وكلت هاي اعراض مرض عادي وعبالي اني سمنانه لو من الدوه مال الضغط للي اخذه ابد ما توقعت حامل.... فاطمه...زين شنو ولد لو بنيه ... امي...لاولد وهم اثنين يعني توم.... فاطمه...صدك واخيرا راح يصير عندي اخوان
..
- فاطمه..يمه فدوه اروحلج  لتبجين وهم انسي ذاك الشاب وخلي نعيش حياتنه طبيعي مثل باقي الناس حبابه لتكتلين أبويه وتخلينه اني واخواني ايتام و ضايعين...شنو ذنبنه أحنه امي...

.-انخرسي اني اصلا بعدني صغيره عمري 29 سنه وتزوجت ابوج واني عمري 12 وبالغصب هم لان جنت احب واحد من الطفوله واهلي من عرفو زوجوني واني صغيره غصب وهو ما خاني 17 سنه هو ينتظر ابوج العله يموت ونخلص منه

بس ما مات كلت اكتله واخلص منه

فاطمه.. كمت ابجي بحركه واصيح بصوت عالي كأنما اول مره اعرف انه امي راح تكتل أبويه......

...يمه لا الله يخليج لتسوين هيج بابا يحبج هواي شفتي شلون ضربني وبطلني من المدرسه وحرمني من كلشي لان كليتله عليج...يعني عنده ثقه عمياء بيج فدوه اروحلج  انسي ذاك الشاب وخلي نعيش حياتنه.
صاحت بيه وكامت

-اسكتي بلا حجي زايدد...

فاطمه ...لا لتطلعين..

.شفتها دارت وجهه عليه وعيونها متروسه دموع وبدون متجاوبني طلعت وسدت باب المخزن

..للي اني بيه.. صرخت صيحت محد يجاوب وكلت يمكن راح تكتل أبويه هسه..

.وصدك راح تكتله هسه لان سمعت هذا الرجال موجود ويحجي وياهه صحت لامي

فاطمه...يمه يمه اكو حيه هنا الحكيني.. هو كلشي ماكو بس اريدهه تجي تفك هذا اللي بيدي.. سمعت جواب..

فاطمه...صرخت بصوت يمممه  حيه اكو هنا الحكيني انفتح الباب والضوه ودخلت امي....

..حيه هنا الحكيني..  ابجي من الخوف خاف صدك تكتل ابويه..

امي...وين وين اكو

..
سويت روحي دايخه وراح يغمى عليه اجت تضرب بوجهي تريد تصحيني وهمزين نجحت الخطه وشالت هذا القماش عن ايدي وتكومني واني اسوي روحي كوه امشي ودايخه..طبعا مابيه شي بس اريد اشرد الحك على أبويه ...دخلت للحمام سويت روحي وكعت على المغسله وجان اكو ماسحه يمي لزمتها وضربت بيها امي ...تجرأت بس اريدها تعوف أبويه بحاله لعد شسوي..

.امي ظلت تصرخ عليه بس اني مستمره اضربها وادفع بيها بالماسحه وطلعت وسديت باب الحمام ونزلت ركض طلعت للشارع بدون حجاب هذا الرجال شافني بس خزرني وعاط بيه واني اركض شفته راح يفتح باب الحمام على صريخ امي وابويه نايم يعني اكيد هسه  كعد...

تهسترت ابجي حيل واصيح ماعرف شسوي ارجف ارجف بشكل مو طبيعي الي يشرفني يكول متكهربه من كثر مايرجف جسمي..

رحت كلت لجارتنه للي ماشايفتها لان اصلا ما اشوف بشر محبوسه بالبيت ..

-اشهك واحجي بالكوه  كلت لجارتنه راح يكتلون أبويه الحكوو..

بعدني ما مكمله كلامي واله اسمع صوت الطلقات
اجتني قشعريره بجسمي وكأنما توقفت الحياة للحظة ماعندي كلمة تكدر توصف شعوري بذاك الوقت..
ورحت امشي على كيف نوب ارجع اركض وعيوني مفتوحه على حيلها وشفتي ترجف وماكدر احجي شي دخلت البيت واني روحي احسها دتطلع احس بثكل على صدري لدرجة اريد احجي احس لساني مربوط..
بعيوني شفت ابوي
يموت وعيونه مدمعه وهوه يباوعلي ويباوع لأمي...اخر كلماته سمعتها كال بصوت مخنوك...حساااافه ماصدكتج يا فاطمه  ضلمتج سامحيني..
يحجي واني احس اكو واحد جاي يملخني من الداخل احس شراييني تتكطع وروح ابويه ماعرف شلون اوصل شعوري..
هو وكع كبالي واني وكعت دايخه احس بتشويش بعيوني 
لحد ماصحيت على الي ديصير من شفت امي ترجف وتباوع لابويه والرجال يلم بالغراض سحب هل رجال أقسام ووجه المسدس الي بس امي لزمت ايده وكالت لا عوفها امشي خلي نروح قبل لا يشكون سمعت الرجال صاح لججج ترديها تفضحنه لعد وين الخطه شفت امي بسرعه لزمت المسدس وشمرته على جيرانه وكالت امشي نروح هو عافها وطلع وهي ركضت وراه.. بخلال هل ثواني كلشي يصير كدامي واني صافنه وابجي بسكته لحد مارجعت عيوني على جثة ابويه الي بالكاع..
فقدت تخبلت كمت اصرخ واملخ بروحي جان ابويه بأنفاسه الاخيره...اخر نظرة لامي  وهي تطلع ويه وذاك الرجال  شالو جنطهم وطلعو من الباب الخلفي مو من الباب الرئيسي لان...
يتبع..

طلعو من الباب الخلفي مو من الباب الرئيسي لان لو طلعو من الرئيسي الجيران للي كتلهم راح يعرفون السالفه وميخلوهم ينهزمون....

رحت على ابويه اجر بقميصه واصيح بابا اكعد اكعد افتح بعيونه واكله هسه تكعد ادري بيك باوعتلي امي وكامت تبجي جرها ذاك الرجال  وطلعو..

.. واني مستمره ابجي على صدر ابويه وامسح وجهي بدمه واصرخ بأعلى صوتي لحد ماصار صوتي مبحوح..

. دخلو بعض الجيران على صريخي ولمن شافو المنظر شهكو وهم ظلو يصرخون دخلو هواي ناس لبيتنا مصدومين ويسألوني واني ما اجاوب بس ابجي واشهك احس روحي فقدت كلشي خلص مابقى سبب لحتى اعيش بعد ابويه ماااات وامي عافتني وين انطي وجهي..

..  ضحيه اني ضحيه اني مجرد شي زايد عن حاجتهم حسيت نفسي ما الي قيمه ابد اني والميت سوه بعد دقيقتين اجه عمي الجبير لان بيته ويانه بنفس المنطقه ويمكن سمع السالفه من الجيران والصريخ والهوسه يعني معروف اكو مصيبه

اجه عمي ظل يصرخ ويحجي عليه ويكول هاي شنو احجي اجه جرني من قميصي وعيونه نار اني ظليت اصرخ من الخرعه واني هم ناعمه من جرني من قميصي صرت لعبه بإيده يكولي تحجين لا اكتلج هسه ما احجيلكم صريخ النسوان وبنفس الوقت اجه عمي الصغير وعماتي اثنين وياهم يصرخن ويملخن بروحهن واني عمي يركع راسي بالحايط ويصرخ احجي...

فاطمه ابجي واكول... عمو والله مو اني والله هاي ماما هيه وشاب ثاني كتلو والله وراحو شردو

عمي كام يبجي ويكول والله ادري مو كتلك هاي مرتك ساقطه جنت تغلط عليه وتكول اني اريد اخرب بيناتكم وهسه منو فادك
كلنه نبجي والصريخ واحد اعلى من الثاني حتى احس اذاني انسدت من الصريخ....

ردت اطلع بره لان دخت وبعد ما اشوف زين صريخ عالي طلعت بره شفت عمي الجبير للي اسمه موسى طلع تلفونه وهو يبجي اتصل على الشرطه وكللهم عدنه جريمه والمجرمين بالمطار هسه..

وسد التلفون بعصبيه وخله راسه على الحايط ويبجي اني دايخه وابجي بهدوء وكلما اتذكر انه ابويه مات وامي كتلته ابجي بالزايد..

.. وره 10 دقايق اجت سيارة الشرطه ودخلو يتفحصون البيت كله والجهال كلها يم بابنه مكيفين اجت الشرطه....بعدين كالو نريد اسمائهم نشوف المسافرين بمطار بغداد وبقو يحجون ويه عمي ويسألو وهو يجاوب ماسمعت شي ما اسمع غير الصريخ وما اشوف غير دموعي ماكو بنيه بعمر 17 تتحمل هيج مصيبه امها تكتل ابوها شي صعب الواحد يتخيله مو نوب يعيشه بالواقع

ابجي وابجي واكول ليش امي هيج سوت رغم شافت ثقة ابويه بيها بطلني من المدرسه وكطعني ضرب لحد ماجسمي صار ازرك لان اتهمت امي وهم مو تهمه حقيقه

ليش هيج امي معقوله اكو غير امي هيج نوع من الامهات للي اصلا ميتسمن امهات للي تسوي هيج بعائلتها مو ام اوووف اوووف شيفيد الحجي بعد الراح راح واني هذا حظي الي خلاني انولد بوسط هيج عائلة

.وره شويه اجه عمي اخذني لبيتهم يعني ابقه يمهم احس روحي غريبه وضايعه شعور مينوصف فجأه تفقد ابوك ووو امك السبب ونوب تفقدهم ثنينهم وتنشمر بيت ماشايفه!

تره اني بيت عمي ماشايفته ابويه ميخليني اطلع من البيت نهائيا واذا اريد اطلع بالسنه مره يعني صدك بالسنه مره مو هيج حجي حتى ولد وبنات عمي عدد المرات الشايفتهم بيها تنعد على الاصابع...

.. اول ماطبيت للبيت تلكتني مرت عمي كلش حنونه وفقيره تبجي واجت تحضني وتبجي على هاي المصيبه واني من شفتها حسيتها مثل امي او يمكن هذا الشعور حسيته لان امي الحقيقه ولايوم حنت عليه ابجي بحضنها بصوت عالي لحد مادخت وراحت جابتلي مي شربت وكلساع اغص ودموعي متنشف

اجت هدى بنت عمي الصغيره...
كامت تبجي ويانه وعلى حالتي هم وره شويه اجت اسراء  الجبيره يمكن عمرها 25 سنه وللي سمعتها انها ارمله ظلت تعلج وتحجي ويه امها تكول شنو هاي بنت الساقطه مدخليها لبيتنا اني من سمعتها عرفت دتحجي عليه تفاجأت من جرأتها بس غلست لان مالي خلك اصلا

كامت تلعب نفسي من كثر ما ابجي رحت لغرفة البنات دلتني عليها هدى شمرت روحي على جربايه وغطيت راسي وابجي اجت هدى تبجي ويايه بس وره 5دقايق

طبت اسراء وجهه ميبشر بخير كالت امج سجنوها هيه وواحد ثاني وبعد ثلاث ايام يعدمون الرجال بس امج منا لمن تجيب الاعدام.. اني ساعتها احس هيج غواش على عيوني لا اسمع ولا اشوف احس اكو شي محطوط على اذني مااسمع مثل الراديو العطلان خلص

تدمرت اني لا اب لا ام لا عائله لا اخت لا اخ لا دراسه ولامستقبل ولا سمعه زينه احس المصايب اكثر من طاقة تحملي الالم دياكل بيه وماتحمل بعد...

. وكعت واغمى عليه
....
ملاحظة.
طبعا ماكو واحد يخطط لجريمة ويترك أثر يعني ام فاطمه وحبيبها جانو متفقين حتى فاطمه يكتلوها ويحركون البيت وميبقه أثر او دليل عليهم ومن يسافرون محد يلكاهم بعد بس ام فاطمه خربت كلشي من ماقبلت فاطمه تنكتل.. متناقضة كلش بس كلب الام ميتحمل رغم هي ماعده رحمه بس مارضت تكتل بنتهاا.. ماعرف شكول بحقه حيرة والله لا اكدر اكول الله يسامحها ولا اكدر اكول الله لايسامحها.. عاطفتها جرتها انو تقتل زوجها وعاطفتها جبرتها انو تترك بنتها وتدمر كل مخططاتها..
مرات العاطفة الزايدة عن اللزوم مؤذية بششكل..
أحذروا يابنات.
العاطفة توصلج لأخطاء مالها حل
لو كل واحد بمجتمعنه يتصرف بالعاطفة بعيدا عن المنطق جان ادمرنا من زمان
اذا حكمت العاطفة معناه ماكو قيمة للقانون ولا للنظام ولا للحياة المستقرة..

يتبع...

كعدت لكيت روحي بالاستقبال مشغلين المكيف لان صيف وحاره ومغطيني من فتحت عيني احس روحي اول مره نولدت هيج اريد اذكر شي ماتذكر شبه فقدت الذاكره بعدين تذكرت كلام اسراء شهكت وكمت اصرخ دخلت مرت عمي على صريخي واني ايدي ترجف

مرت عمي... شبيج يوم شتحسين
فاطمه ابجي مثل الجهال واكول... ماما ماما بابا وينهم راحو مو ماتو واني هم راح اموت..

مرت عمي... ياحبيبتي فطومه لتبجين تخربين وجهج الحلو كلشي بيد الله والاعمار بيد الله
فاطمه... ماما عدموها موو
مرت عمي... لا بعده مسجونه
فاطمه... يعني راح يعدموها
مرت عمي... اوووف فطوم حبيبتي امج مجرمه هو هذا العدل....
فاطمه صرخت بصوت عالي وكمت الطم صح امي مجرمه وخاينه... بس هيه امي الشي الوحيد البقه من عائلتي اجت مرت عمي حظنتني وتكلي لتبجين كلبي تكسرين خاطري اني امج... وعمج ابوج... وهدى واسراء خواتج... وعلاء وحسين اخوانج.....
كلامها خفف من المي ووجعي شويه احتاج واحد يواسيني

،، يهتم بيه،، يرجعلي قيمتي ك إنسانه ظليت ابجي بحضنها لحد ماتعبت كلتلي كومي صلي الله يعوضج بالاحسن صدك كمت توضيت وصليت وقريت قرآن.

... بس كوه اقره لان صارلي هواي لاقاريه ولاكاتبه وحتى قرآن ماكو بيتنه اي والله منو يقره قرآن حتى ابويه يقره بالموبايل وامي... آاااه تعرفوها بعد....

.
كلما اتذكر انه امي هسه مسجونه وتجيني فكرة راح يعدموها يعني تموت!

هيج تجيني قشعريره... دعيت لامي ولابويه الله يرحمه وكمت ابجي بحركه... واني ابجي دخل حسين ابن عمي عمره 22 سنه شافني ظل صافن بعدين سد الباب وطلع.... كمت اروح اساعدهم بالغده لهسه احس

بالغربه والبس حجاب ومتقيده بس شسوي هاي عيشتي كضيت عمري هيج قهر وخنكه وبجي اصلا زين لهسه عايشه .... طبعا اسراء متطيقني وبس تسمعني حجي

وتباوعلي صفح اني مالي خلكها ولا الي خلك مشاكل وجدال كلبي خلصان حظرنه الغده بس اني ماتغديت استحي حسين وعلاء موجودين...

رحت كعدت بالاستقبال اجت هدى كلتلي كومي تغدي كتلها ماجوعانه
هدى... كومي لج ادري بيج تستحين...

كلنا اخوانج اعتبري نفسج جزء من عائلتنا
فاطمه اختنكت وكتلها... ماكدر ماصارلي يومين هنا وهم اخوانج كبار عيب والله استحي
هدى... اهووو تكومين لو شلون
فاطمه... شلون
هدى... يمه اول مره اشوفج تبتسمين شوف شلون حلوه ضحكتج...
فاطمه...
هدى... اجيب الغده هنا واتغده وياج
فاطمه... ماشي ع راحتج.....
تغديت وخلصت غسلت المواعين ورجعت اريد انام افكر بأمي اريد اشوفه قبل متموت باجر يعدموها.. كمت ابجي بصوت ناصي شلون تالي بحياتي ماراح اعيش مرتاحه..... ااااه
بجيت لحد ماتعبت ونمت اصلا تعودت على البجي صار شي كلش عادي ميفوت يوم ما ابجي بيه..... ماكدرت انام من كثر التفكير والخنكه احس روحي كوه اجر النفس... مشه الوقت بطيئ كلش احس الثواني وعيني على الساعه مانزلت افكر بشعور امي هسه... وابويه هسه شيكول وشلون حياته يم الله اكيد الله رحمه وهو ارحم بحاله من الناس... اشتاقيت لابويه كمت توضيت وكعدت اقره قرآن.... دخلت هدى كلتلي صوتج حلوو ابتسمت وكملت قرايه هيه تباوعلي بنظرة شفقه لان اقره وابجي حتى هيه دمعت عيونها..

.. بعدين طلعت...
صار الليل والوقت يمشي ثكيل على كلبي وبس اجر حسرات ...

. وقبل لا انام رجعت اتذكر شريط حياتي والقلل ياكلني اكل اريد اشوف امي لو احجي وياهه ميصير تموت هيج اخر مره شفتها بيها من جرها هذا الشاب وجانت تباوعلي والدموع بعينها....

ظليت الليل كله اغفه وافز وكلساع احلم كابوس واشهك باجر يعدمون امي.....

...!،،،،، تره مو شي سهل وبكل سهوله ينكال صح امي غلطانه ومو غلطه جريمه بس اني شنو ذنبي احس روحي غريبه اني شنو موقعي بالحياة اصلا اني من جنت يم اهلي احس روحي غريبه مو هنا حتى بيت عمي احسن يضحكون يسولفون ويلتمون شقه وضحك.

.. صدك عائله هنياالهم وهنيال كل شخص عنده عائله متماسكه اي احسدهم والله احسدهم وصلت لمرحله اشوف النمله النمله مرتاحه اكثر مني مهما تألمتو من خلال قصتي مستحيل تحسون بالوجع والالم للي يكطع دمي وانفاسي وروحي....... الم يكطع....

الليل كضيت حسرات ودموع وونين وخوف ومحد يحس بيه وهذا للي يزيد المي المم..

.. طلعت اشرب مي واغسل وجهي شفت حسين هو من شاف حالتي هيج كام بسرعه جان حاط عينه بالمبايل وحالتي مبهذله عيوني ذبلانه وحمر من البجي وجهي اصفر وارجف وشكلي مثل المخروعه....

حسين... فاطمه فاطمه شبيج...
. شفتها داخت وتلزم الحايط وتمشي مثل السكران اني تخبلت ماعرف شسوي رحت لزمتها تمشي ويايه كعدتها على القنفه احجي وياها متجاوبني بس تبرطم وكأنما تريد تحجي شي وتسكت

كلت اخاف نخرست هالبنيه..
يتبع...
مريم التميمي

كلت اخاف نخرست هالبنيه كتلها يمعوده احجي خوفتيني كالت امي هسه بالسجن

وكاعد تبجي وخايفه وماكدر اشوفها بعد اني جريت حسره وسكتت شكللها هاي ماراضيه تفتهم كتلها ولج امج مجرمه مجرمه..

شلون يطب الحجي بعقلج اشو هاي كامت تبجي اكثر خفت لايكعدون اهلي اجيت اسكتها واواسيها اريد بس تسكتت هدئت

بس ظلت تشهك اخر شي لزمتها من ايدها وكومتها غسلت وجهه وكعدتها اريد احجي وياها بلكت تنسى امها وابوها شويه هم خطيه شنو ذنبها عمرها 17 سنه وكل هذا فوك راسها كتلها انتي من شوكت مبطله..

فاطمه... من الخامس ابتدئي
حسين... حرامات هواي رايحه عليج سنين هم تتمنين ترجعين للمدرسه
فاطمه... اي والله ياريت
حسين... شنو رأيج ترجعين تداومين مسرع يختصرولج سنتين بسنه وحده بس الدراسه تصير صعبه كلش
فاطمه... ماصدكت من سمعتها صحت والله بس بعدين خجلت من نفسي تكول جاهله ومنطيها لعبه.

حسين... ههه مكيفه يعني الج واهس بالدراسه حرامات بطلتي.
فاطمه... ظروف شسوي
حسين... الله يعوضج
فاطمه... نشالله...
حسين... يله كومي نامي راح يكعد الديج
فاطمه.... لابعد وكت الساعه ب 2:33
حسين... يا اي والله بعد وكت لج بعد ساعتين ويطلع الديج وتصيح الشمس.
فاطمه... شبيك كمت تمسلت
حسين... من النعاس
فاطمه... ابتسمت... يله تصبح على خير
حسين... وانتي من اهله
فاطمه....رحت خليت راسي على المخده شويه رتاحيت ومو راح بس خف القلق ضحكت لاول مره من قبل شهور ماضحكت هيج والله عندي الضحكه اذا تطلع من كل كلبي عيد نمت وماكعدت اله ب 11:6 كعدت فزيت امي امي ماتتتت عدموها شلون نسيت كمت اشهك بدون دموع وارجف اجت هدى كالت اسم الله شبيج جابت مي وترش على وجهي لان اتنفس بسرعه واشهك بصوت عالي وكأنما اني بمكان امي احسب الساعات واحاول احس شلون امي دتعيش تره صعبه الواحد ينتظر موته كلش صعبه.

. المهم اختصارا لما حدث بشهر امي السابع من حمله تمرضت حيل يعني هذا للي سمعته وجابت نهاية الشهر السابع اخواني محد من عمامي ستقبلهم بعتبارهم غير شرعيين ومو ولدهم  بس الي اذكره امي كالت همه من ابويه،،؟ ومن حجيت الكل كال اسكتي ومحد بحالي.. يعني معقوله امي مجذبه عليه لو همه عمامي مفتهمين غلط.. هنا ظليت حايره بصراحه ولهسه ماعرف شنو السر بهلموضوع.. اخذتهم خالتي للي بتركيا خابروها كلوله اذا مترديهم نوديهم دار الايتام طبعا اني مالي حق احجي اصلا كافي همه ملفيني وماشمروني بدار الايتام بس شلون ولد ثنين يخبلون احلى مني اخذتهم خالتي وجانت تكرهني تكول انتو جنتو سبب موت اختي زوجتوها غصب وهيه طفله شتتوقعون منه والله يالله فوكاها تدافع عنه طبعا هواي بجيت على اخواني لان ماكدر اشوفهم وراح يسجلوهم بأسم خالتي

عساس خالتي امهم لان مزوجه وماعده جهال يعني حتى من يكبرون ميعرفون اني اختهم ولايعرفون الي صار حاله تقهر وطبعا هذا الرحال للي يعتبر ابوهم عساس اصلا عدمو لان يعتبر مجرم وطلعت بي قضيه هو بايك فلوس مره عجوز

وكاتلهه هو هذا الي امي كتلت ابويه علمود اوووف احاسيس اني ما اكدر اوصفه لروحي خلتني ابجي بحركه اجتني هدي كلتلي ..

.. شكد تبجين ارحمي عيونج شويه كمت غسلت وجهي وطلعت بره جان الجو حار كلش بعز الصيف بس من كثر حركت كلبي ما احس بالحراره والله صدك ما احس بحرارة الجو نار كلبي توجع اكثر كعدت افكر وكلت خلص هاي عيشتي وهذا المقسوم والصار صار وشكد مابجيت وضوجت روحي مراح يتغير شي قررت اصير قويه وكافي بجي تعبت تعبت من روحي قبل الناس.

تسريع الاحداث (راح اختصر بالاحداث للي تصير لان هواي تفاصيل والقصه طويله لو اكعد اكتبها بكل تفاصيلها تصير ممله).

فاطمه..
عشت حياتي مثل البنات وحاولت حتى لو بس اتصنع الضحكه اكل للي يعجبني والبس اي شي يعجبني اسهر واصلي اشوف افلام واسولف واضحك احاول اونس روحي محد ساعدني ولا احد يفيدني وكمت ادرس مسرع يعني اختصر مثلا 3 سنين بسنه هيج او سنتين بسنه يعني حسب السنين التاركتها وعمري تغيرت حياتي كليا وتقريبا كمت انسى للي صار او اتناسى وبيت عمي صارو همه اهلي وابد ما احسسوني انه اني ثكيله عليهم بالعكس يشترولي احسن من بناتهم وبدون ما احجي وهدى كلش حبابه ويايه صارت صديقتي واختي بس اسراء تكرهني ودائما تسوي مشاكل حتى مرات عمي يصيح عليه وتتهمني ظلم بس اني اعبرها كلتلكم تغيرت بعد حتى ما ابجي هواي شبيكم متصدكون وصار عندي كومه صديقات بالمدرسه بس ماعندي ثقه بأي احد والله بعد للي صار بحياتي خلص ماكو ثقه بس هدى بس هيه واثقه منها لان كلش حبابه ومواقفها ويايه حلوه حتى تدافع عني ومستعده تترزل من تتهمني اسراء وبالمدرسه تغششني اذا مااعرف

الجواب صدك اني وياها نفس الصف رابع اعدادي هيه عمرها 16 بس اني بهل الفتره صار عمري 19 اي هاي كلها صارت بسنتين...اليوم الصبح كعدت

يتبع....

.... اليوم الصبح كعدت دوام صباحي وامتحانات نصف السنه الجو بارد ثلج اجت تكعدني هدى واني من كثر مانعسانه ردت ابجي اخر شي كعدت مثل الحوله وشعري كفشه

طبعا حسين بالجيش وعلاء متزوج وقبل سنه طلع من البيت احلى شي ماخذه راحتي غسلت وبدلت وطلعت ويه هدى

نروح مشي مدري ليش يمكن ماعدهم فلوس واني ماعندي جرءه اسئل كافي همه معيشيني ومتحمليني وسمعت امي مو زينه واني مو بتهم وهذا عمي الوحيد للي ستقبلني باقي عماتي وعمي الثاني ميحبوني ومااروحلهم يكولون تذكرينه بأمج.

يووووه هم رجعت لأمي ما ادري من اتذكرها كل للي صار يمر على بالي مثل الشريط ويكطعني الالم من اتذكر ذيج الايام السوده افف يله يله ذكرتكم ويايه يمكن مدتحسون بالالم للي احس بيه بس كافي متحملين قصتي وتقروها اصلا اني من اتذكر حياتي تلعب روحي ماريد حتى اتذكر

المهم كطعت حبل افكاري هدى هسه مو دا افكر والمتابعين متأثرين اجت هاي الحشريه تجرني تعالي شوفي ذاك يبيع موطه

فاطمه... خبله اكو واحد ياكل موطه بهل البرد واصلا هذا للي ديبيع هم يمكن خبل مثلج
هدى... حبابه بس خلي اشتري عندج فلوس اني ماجبت ويايه
فاطمه... هيه بس الف دينار وتريد انطيها
هدى... شبيج هو ربع ليش تصيرين بخيله
فاطمه... هاج هاي خمسميه فدوه تروحلج كل الفلوس واني هم وياهن

هدى... انتي تخوفين تكسرين وتجبرين دنطيني نطيني
فاطمه... كبر هاي عود اريد اصير حبابه

راحت اشترت واجت تاكل موطه بالبرد.

وصلنه للمدرسه ومن رجعنه جان حسين جاي من الجيش اني سلمت عليه ورحت ختلت بالغرفه صح صارلي سنين بس لهسه استحي ما اكدر اتعود اصلا.

لبست حجاب وكعدت بالغرفه اراجعع دروسي لحد ما اجت هدى كلتلي تعاي تغدي اني كمت ورحت كعدت وياهم همه يسولفون ويضحكون واني بداخلي شابعه قهر تمنيت اعيش اجواء العائله هاي تمنيت احس لمره وحده انو عندي عائله متماسكه مابيها مشاكل وحتى لو بيها مشاكل عادي المهم عندي شي اسمه عائله..

.. المهم خلصت غده ورحت للغرفه اجت ورايه هدى كعدت تلعب بتلفونه كتله هذا تلفونج كالت اي.
هدى... صدك فطومه معندج تلفون... يعني حتى لو باقي بيتكم القديم.

فاطمه...لاوالله ابد اصلا ماعرف شلون استخدمه.

هدى.. ياا حرامات والله شنو رأيج تستخدمين موبايلي
فاطمه... ممم ماعرف
هدى... ممم بحلكج تف تعاي اعلمج عليه
فاطمه... تمام... علمتني هدى عليه شويه غريب بس حلو هسه ضحكون عليه بس قبل لضحكون تذكرو انتو اول ما استعملتو المبايل شسويتو.

..........................................♡.
هدى.. فكرت كلت خطيه فاطمه ماعده تلفون وهيه اكبر مني راح تطب بالعشرين خطرت بالي فكره ورحت اكول لحسين لان هو الوحيد الي يكدر يساعدني... رحت لغرفته جان كاعد عللابتوب كتله حسون ممكن احجي وياك
حسين ... خير شرايده احجي من الاخير
هدى...على كيفك عيني شدعوه هيج عصبي مدري مستعجل
حسين... هدى تره طلباتج متخلص ادري بيج احجي بسرعه بدون لف ودوران
هدى... اوك اوك تعرف فاطمه بت عمي الله يرحمه
حسين... اي شبيه
هدى... شتكول لو نشتريله هديه اني وياك تلفون خطيه ولك حتى متعرف تستخدمه
حسين ظليت صافن افكر مدري ليش حبيت الفكره كتله اي عادي بس لو بعيد ميلاده احلى
هدى كمت اكمز ورحت حضنته... يعني يعني قبلت فدوه لاخويه الحباب
حسين... رجاءا بدون لواكه لان تخليني اعاند
هدى... اوك اوك
حسين... بس لازم تعرفين شوكت عيد ميلاده حتى نسويله مفاجأه
هدى... اي اعرف واكلك
حسين... تمام رديلي خبر عود
هدى... اوك

...................................................................................♡.
هدى.. رحت لفاطمه كتله فطوم شنو تاريخ ميلادج
فاطمه..ليش تسألين
هدى..هيج بس ردت اعرف لان عيد ميلادي قريب
فاطمه.. شوكت
هدى.. بعيد المعلماول يوم شهر الثالث.
فاطمه..كولي والله
هدى.. والله شبيج
فاطمه.. كلش قريب نيالج بعيد المعلم يسوون الج احتفال حتى بالمدرسه
هدى.. هسه انتي شوكت ماكتيلي
فاطمه.28/5/1998
هدى.. مممم اوك يعني بالامتحانات يالمسكينه

فاطمه.. هههه عادي هو اني شوكت تذكرت عيد ميلادي اصلا ولا بالي
هدى... ههههه يله راح اروح اقره
فاطمه..تعاي تعاي ليش سئلين
هدى..لاماكو شي. سلامتج
فاطمه.. لا اكو شي شنو ضامه عليه

هدى.. والله ماكو شي بس هيج عبالي قريب على عيد ميلادي حتى نسوي اني وياج عيد ميلاد واحد نجمعهن بيوم
فاطمه..كبر امشي ولي عبالي سالفه بيها خير

............................................
قرآءه ممتعه اعزائي

هدى.. خططت لعيد ميلاد فاطمه ومنتظرته كلش.

فاطمه... حياتي صارت احلى شويه وكمت احب المدرسه وشاطره كلش عكس هدى تكره المدرسه جنت كاعده اقره أحياء لان اني علمي/احيائي اريد اصير دكتوره جراحه هههه صح تحتاج جرأة بس ماعرف ليش احب هاي المهنه تندمت عل السنين الراحت مني صديقاتي الي بعمري هسه كليه مرحله أولى هفف يله عاد الحمد لله رجعت للدراسه اجت هدى تكول اففف عدنه متحان والله مالي خلك اقره شوكت تخلص السنه لعبت روحي.


كتله.. انتي معندج طموح يعني متردين تصيرين شي؟ معلمه مهندسه محاميه معندج هدف.

هدى... بصراحه لا واللههدفي الكه واحد يحبني ونزوج واصير أم اصلا أكره المدرسه بكبرها بس لأن اخواني كلهم واصلين فشله اني ابطل

فاطمه... كبر لا والله اني عندي طموح عاليواريد اصير دكتورة بالجراحه
هدى... يعني سوين عمليات وهيج شي

فاطمه... يي
هدى... اسم الله نعوذ بالله لك متلعب نفسج متخافين
فاطمه... لا عادي اصلا احب هيج شي
هدى... انتي مو طبيعيه ابد
فاطمه... لعد اصطناعيه
هدى... خاب ولله بطرانه اروح اسمع اغاني احسن
فاطمه... اوك براحتج.طلعت هدى واني كعدت اقره ما اضوج من اشوف عده موبايل واني لا لان اكول بداخلي هيج احسن عل الاقل اني عندي هدف و الدراسه حلوه والله بقيت كاعده لل 12 بالليل اقره وهيه تباوع بالموبايل خلصت كل دروسي سديت الكتاب وكتله مانعستي كالت لا بعد وكت اصلا نامي انتي اني اتأخر.

اني هم صدك غسلت وجهي لان تعبت أيدي صارت رصاصيه من القلم الرصاص والجاف

...........................................................................
نمت وكعدت دوام صباحي اسحل بهدى سحل متكعد تكول عوفيني ولج نايمه بل 3 ونص آخر شي كتله راح اطلع اني شنو تغيبين كالت اي اي روحي كتله والامتحان كالت مالج علاقه هو اني اول وتالي مصخمته

اني كتله براحتج وطلعت شافتني ام هدى كالت شنو هدى متروح كتله لا نايمه تريد تغيب.

ام هدى... وانتي طلعين وحدج؟ تره الطريق طويل
فاطمه... اي عادي هو ساعه زمان وأوصل.
ام هدى... ديربالج على نفسج وهاي الثوله هدى اني أعلمه.
فاطمه... لا خاله خطيه البارحه اني نمت وهيه تقره ماهدت الكتاب خطيه تعبت (لزكته اله )
ام هدى... وهسه اني صدكت بنتي واعرفه اول تالي هدى تسهر على دراسه.. ديله يله روحي لتتأخرين.
فاطمه... اوك مع السلامه.
ام هدى... الله وياج.

 ☆☆................................................................................
فاطمه...
طلعت للمدرسه ورحت اشتري بالطريق شفت بنيه يطلع عمره 7 او 8 سنين هيج تقريبا لابسه فستان احمر وكاشخه بس تتلفتت

وتبجي ماعرف شبيه اني طبيت للمحل وشتريت وطلعت كبل للمدرسه لان شفت الساعه بالمحل تأخر الوكت وصلت قريب من المدرسه شفت شاب واكف يم ابو ستوته

ويسأله ما شفت بنيه صغيره لابسه احمر هنا تفوت منا منا عاد اني فتهمت انو هل بنيه ضايعه وهذا أخوه مدري ابوه يدور عليه.

رحت كتله خويه من رخصتك بدون تدخل بس انته تدور على بنيه لابسه احمر؟

كال اي ليش شفتيه كتله اي ودليته عل الطريق يم ابو محل تفوت منا نوب منا هو كال تكدرين تجين ويايه لان مو منطقتي وما اندله زين كتله مو عندي (كلت بكلبي عندي مدرسه بس سكتت لان كلت خطيه اخاف ميلكاه)وكتله اوك تعال وياي مشيت وصلت يم ابو المحل وهو كلشي ماحجه خوفني كلت هسه يطلع عصابجيوبدت الأفكار السودايويه تلعب بعقلي..


كتله جانت هنا هسه ماكو وين راحت.
كال اهووو هاي وين تروح خبلتني.
كتله هيه شصير منك؟

كال بت عمي تصير ماعده اخوان ودزوني اخذه لاهلها لان جانت تلعب ويه اختي الصغيره صارله يومين عدنه.
فاطمه..  اهاا لعد راح إسأل ابو المحل يمكن شافه.

طبيت للمحل سألت أبو المحل كال اي هاي البنيه هنا كاعده يمي كلتلي ضايعه كتله لترحين بعيد نوب ضيعين اكثر.
أخذته وطلعت نطيته للولد وهيه ماقصرت حجت له كلشي.

هو كالي مشكوره خيتي تعبتج وياي اذا تحتاجين شي اني مدرس خصوصي بفلان مكان و شتردين اني حاضر.
-تسلم. هذا واجبي. يله اروح للمدرسه مع السلامه.

....................... ♡................
رحت مستعجله للمدرسه تأخرت كلش وصلت لكيت المدرسه هدوء خفت وصلت للصف لكيت بادين بالدرس.

توسلت بيه تدخلني آخر شي كالت لان انتي شاطره وهاي اول مره تتأخرين راح ادخلج.
اني طرت من الفرح كتله شكرا ست ورحت كعدت.

....................... ☆................
خلصت المدرسه ورجعت للبيت لكيت هدى هم كاعده عل الموبايل وتاكل.

هدى... ها رجعتي.. ولج فاتج والله لو غايبه نزل فلم جديد يجنن شفته وحدي حرامات.

فاطمه... هففف.. سكتي انتي بطرانه.
هدى عدلت كعدته... ليش ولج شبيج صاير شي.

فاطمه... سلامتج بس بل الامتحان مو زينه وتأخرت عن المدرسه ورزلتني المدرسه كدام الطالبات.

هدى... لج شصايير لتخوفيني..
فاطمه.. مو مهم.
هدى... لا احجي.
فاطمه.. (حجيت اله كلشي صار وليش تأخرت وكلشي).
هدى...
يتبع...

........................... ☆...............

هدى.. انتي هم فد وحده شكول عليج استغفر الله...
ادري  شلج علاقه بيه يطبه مرض يمكن يطلع حرامي جذاب اخاف خاطفه للبنيه شمدريج انتي بالناس.

فاطمه.. يمكن صدك اني ليش هيج مافكرت
.
بس هيه فرحت من شافته لو خاطفه جان خترعت لو بجت.
هدى.. بكل الاحوال انتي لتدخلين بعد لو شوفين واحد يموت كدامج سوي روحج مشايفه. روحي بدربج ورجعي بدربج.
فاطمه.. اي والله الدنيا تخوف.
هدى.. كولي لروحج.
فاطمه... هسه ديله عاد عود ردت اصير فاعلة خير طلعتي لخير من عيني.
احجي وياه وهيه مركزه بالموبايل يمكن مسمعتني.

مرت الايام عادي نفس الروتين....
بس الجديد انه هدى اشتغل ضميره الدراسي وكامت تقره وتتعب لان بدت الإمتحانات ههع
.

وبيوم من الايام جنت طالعه للمدرسه من وكت وهدى تأخرت واني بالطريق جان اشوف!

هذا نفسه الرجال الي مضيع بت عمه ذاك اليوم! هو لو لا.

باوعت زين اي والله هو! زين شجابه مو يكول هاي مو منطقتي! هففف ردت بكل الطرق اتهرب من شوفته اخاف يسلم لان خوفتني هدى بكلامه ذاك اليوم.

بس كما يقولون بائت محاولاتي بالفششل شافني واجه يسلم اني هم نجبرت ارد السلام.

ومدري شلون طلعت مني وكتله شعجب هنا هم ضايعه بت عمك (كلته بالشقه وضحكت)كال لا مو مدرسته هنا واني أوصله بسيارتي لان طريق مدرستهم على طريق شغلي. خطيه محد يوصله.

كتله هاا الله يحفظكم.
- ويحفظج.
-يله من رخصتك عندي مدرسه تأخرت.
-بس لحظه آسف ع التدخل بس شنو اسمج.
-كلت بكلبي  (ياالله هسه وكتك منين طلعتلي انته شكد مزعج).مممم اسمي فاطمه (طبعا جانت تعابير وجهي وحده تحجي عن انزعاجي هو هم حس.. )
-اني حازم وآسف ع الإزعاج اخرتج عن المدرسه. مع السلامه.
-اني مصدكت كتله مع السلامه. ودرت وجهي ومشيت. مدري ليش حسيته ضاج من تصرفاتي اهوو خاب خل يضوج اني شدخلني.

وصلت للمدرسه لكيت هدى واصله قبلي! رحت عليه ركض كتله لج نذله تاخرتي وواصله قبلي لج شلون!
ضحكت وكالت...
-بنفس الوقت الي طلعتي بيه وره شويه اجه حسين جان نازل  من جيش وكنت متاخره كلش وهو وصلني.
-والله حظوظ . كبر لهل وجه واني لتكسرت رجلي من المشي.

-ههههه حيل حيل.
-شوف شون تشمت يهوديه انتي شنو!
-لا انا مسلمه أشهد أن لا اله الا الله وأن محمدا رسول الله.
-دوخري من طريقي روحي واصله لكصتي عود يعني دمج خفيف وكذا.
-هاي شبيج بس تردين تتعاركين! اني هم ساكته ماخذته بالشقه وانتي تحجين صدك شبيج متكليلي! شسويلج اذا انتي طلعتي قبلي!
فاطمه...سكتت مجاوبت ومشيت صدك شبيه اني أعوذ بالله من الشيطان الرجيم شبيه اني!. كملت يومي عادي بس هدى متحجي وياي هواي يمكن زعلانه او اصلا اني مدا احجي وياه هففف شنو من يوم هذا شوكت يخلص الكآبة واصله فوول.

بالليل جاي اقره اجت هدى كلتلي اكلج كلشي مجاي افتهم بالرياضيات فهميني
اني باوعتله بنظرة شفقه عود وكتله اوك اوك جيبي الكتاب. هيه ابتسمت وكالت ماكدر ازعل منج مصلحتي كله تعتمد عليج.

كتله طاحظج عبالي راح تكولين حجايه حلوه! مصلحجيه مو بيدج.
-هسه يله فهميني هواي ورايه دروس.
فاطمه... كعدت أفهمه لحد ماتعبت ونعست اباوع لساعه 12 وثلث خرب صدك عود شبسرعه شمرت الكتاب على هدى وشهكت ولج هواي عندي دروس بعد ماقريتهن وباجر صباحي. ولي عني

كالت...
عادي اسهري ليوم واحد ع الاقل جربي السهر مخسرانه خساره!
صدك كلت خل اسهر بقيت اقره وهيه تقره شويه وتلتزم المبايل شويه لو مو شويه يعني نص ساعه هيج تقريبا تعتبره استراحه.

آخر شي تعبت ونمت كعدت وكالعاده بالسحل وتهديد يله كعدت هدى من رحنه للمدرسه بالطريق هم شفت هذا.....! استغفر الله شنو جان اسمه  ها ذكرت  حازم .

شاورت هدى كتله هو هذا الي كتلج عليه ذاك اليوم
-ياهو وينه..
- باعي لك ذاك الي ضيع بت عمه اسمه حازم.
-متسلمين!
-نجبي البارحه هم شفته وردت اشرد بس مدري شلون شافني وسلمت عليه! اليوم هم هففف
-هسه بيج تره مكبره الموضوع! يول السلام واجب.
فاطمه... عاد اني ملحكت ارد على هدى وهو شافني هم اجه يسلم عليه ويحجي ويسأل آخر شي كال اذا تردين دروس خصوصية تعالي مجاني تره!.
كتله لا شكرا جدا بس ما احتاج اني شاطره اقره وحدي.

بس هدى الثوله مسكتت! كالت اي والله ياريت!
عاد هو ماصدك كال فلان مكان الساعه 9 نص يوم السبت ويوم الإثنين 4 ونص العصر.

كالت هدى بس الجمعه وسبت.
حازم...اي لان باقي الايام دوام والجمعه عطله لطلاب موكله دراسه.
هدى... اوك اوك اذا فاطمه منجي اني اجي.

حازم... أهلا وسهلا
هدى... شكرا
فاطمه.. .كلت بكلبي اني اعلمج يا هدى .
طبعا وصلنه للمدرسه واني ساكته ومن رجعنه للبيت انفجرت بيه

-انتي مو ذاك اليوم تحجين عليه وسويتي الرجال مجرم وماعرف شنو وتالي ترحين تدرسين عنده مو اني اقريج..
-هوب هوب على كيفج حبي شسويت هسه اني وبعدين كل هذا ضامته بكلبج والله يالله هه الج خلط مشاكل روحي حبيبتي اريد انام.

-لا اليوم متنامين زين كليلي اهلج قبلو؟ لو تصرفين بكيفج!
-اصلا هو بابا جان يدور لي على مدرس خصوصي لان يدري بيه ثوله وماافتهم!
-تعترف
-أي اعرف روحي
-خاب دولي اني هم مدوخه روحي وياج اروح اقره احسلي.
-هسه اني لازمتج روحي اقري.

............................. ☆............
مرت الايام عادي مكو شي جديد... وبس هدى تروح للدروس الخصوصية وكل ماتجي تكول حازم يسأل عليج! خرب بس لا يطلع يحبني! عايزه اني ويني وين الحب!

مره من المرات جنت كاعده اقره ساعه 9:34 بالليل وجان تجيني هدى تكمز وتضحك تكول حزري منو يمنه؟

اني هنا كتلني الفضول منو منو....

يتبع....

ظليت الح على هدى منو اجه منو وهيه حقيره كاعده تلعب بأعصابي مااكول وما اكول آخر شي كتله خاب لتكولين يطبج وجع.

هدى... يله يله راح اكلج.
فاطمه..  ميهم حتى لو متكولين.
هدى..أوي فدوه للكرامه . جايج خطابه عيني ومنو منو ابن خالي الصاك الي يخبل ادري اني كباله هاي لسنين كله مشافني! والله بخت .
فاطمه باوعتله هيج .. صدك ولج(كمت ابجي).

هدى... يااا هاي شبيج ولج ليش تبجين دكومي كومي خل يشوفوج عاد!
فاطمه... ماريد ازوج ماااريد عندي كومه احلام اريد احققه اريد اكمل دراسه.

هدى.. هاي صدك تحجين اعصابج عيني ونتي منو جابرج اصلا! ولله يالله احلام خخخ لك لو اني بمكانج اكللهم اخذوني هسه.
فاطمه... هاي انتي مو اني.
هدى.. هسه كومي سلمي بعدين كولي ماريد ازوج.
فاطمه.. اوك مبين عليه باجيه..
هدى.. اي كلشغسلي وجهج وروحي سلمي.
فاطمه.. اوك بس تعالي وراي فدوه مو تعوفيني وحدي.
هدى.. ولله يالله اليسمعج يكول رايحه بلقاء مهم مع سفير الولايات المتحدة الامريكيه .
فاطمه.. مو وكت تحشيش صدك خايفه تعاي وراي.
هدى.. اوك اوك هسه انتي بس امشي واني وراج.
فاطمه....

رحت غسلت وجهي وامشي عل البطيئ وهدى وراي تشمر حجي دخلت اريد أسلم مدري ليش هيج خايفه ولله أيدي ترجف احس لساني مربوط ماكدر احجي.

عاد هيه المره الكاعده منطتني مجال أسلم بس شافتني كالت:هاي فاطمه! ولله كبرانه وحليانه شوف العيون شوف الرشاقه  ماشاء الله ماشاء الله.

اني كلت بكلبي هو اني منا ارجف اجيتي انتي كملتيه عليه. كوه سلمت وطلعت بسرعه اجتني هدى خربانه ضحك.

وره ساعتين تقريبا يله طلعو وطبعا كل شويه يصيحولي هسه هو اني مال سوالف. ها صدك اني شايفته هذا ابن خال هدى يمكن اسمه كرار.

جنت دا اقره بالغرفة ولا كأنه صاير شي وكل شويه هدى تذب حجايه وتضحك عباله اني خجلانه متدري اني صدك ماريد ازوج وهذا مثل هم واجاني.

بعدين سكتت فجأة. كمت اريد اجسس عليه وجان اشوفه تراسل منو! تخيلو.
كاعده تراسل حازم! بس سوالف عاديه اني بسرعه رجعت لمكاني وسويت روحي اقره وكتله اكلج هدى.
هدى.. ها
فاطمه.. ويامن تحجين.
هدى... ممم ليش سئلين؟
فاطمه.. هيج فضول بس ردت اعرف.
هدى.. ويه حازم.
فاطمه.. هاا. زين سؤال ثاني بس عليج الله جاوبيني صح. اوك.
هدى.. اوك شنو هو.
فاطمه.. انتي تحبين حازم؟..
هدى..
فاطمه.. لتباوعين هيج. جاااوبي.
هدى.. بصراحه تردين صراحه اي احبه ولله واضوج كلش من يسأل عنج.
فاطمه.. هههه ولله عرفت لان تصرفاتج متغيره كلش هل ايام. حسيت يعني زين شلون تحبيه وانتي ممتأكده هو يحبج لو لا.
هدى.. ماعرف والله اني هذا سؤال هم متعبني هففف.
فاطمه..ههه ولله بطرانه يا حب يابطيخ اني بكدج جنت بيت اهلي ماعرف عمري حتى.
هدى.. شقصدج
فاطمه.. هيج هيج سلامتج يله اني اروح اقره .

.................. ♡.....................
هدى...
جنت رايحه للدروس الخصوصيه كالعادة جان يوم اثنين من رجعت من المدرسة بدلت واكلت وتعاركت شويه ونوب وصلني ابويه.. تدرون شصار بذاك اليوم؟.

بعد ماخلصنه الدرس وردنه نطلع حازم كلي تعالي اريد احجي وياج شويه اني طرت من الفرح ماعرف ليش.
هدى.. نعم أستاذ.
-تكدرين تكولين حازم مو اله أستاذ.
-اوك استاذ.
-اكلج هدى اريدج توصلين هذا الحجي لفاطمه. تمام
-استغربت كلش شنو مثلا يريدني اكول لفاطمه؟ كتله اي كول..
-كليله حازم يحبج ويريدج بس كليله هيج عليج الله.
هدى. متتخيلون شصار بيه ساعته شعور صدك مينوصف خيبه على قهر على حقد كون لزمت دمعتي لا انفضح وكتله :ها صدك اوك.
-عليج الله كليله مو تنسين.
-اي اي نشالله.


طلعت مخنوكه وبس اريد ابجي ابوي سألني شبيج صايرلج شي؟

كتله لا ماكو شي بس تعبانه. رجعنه للبيت بسرعه رحت للغرفه ابجي شبعت قهر ليش ليش فاطمه ليش لان حلوه اني شبيه لعد؟ شكد كرهته وحقدت عليه بعدين كلت لا خطيه هسه هيه شنو ذنبه..

.. لعد اني هم شنو ذنبي احجي ويه روحي وابجي كلت ما أم لله اصلا هي مخطوبه اي هيج راح اكله بلكت ينساه ويشوفني....

.................... **....................
فاطمه...
من رجعت من المدرسه هدى راحت للدروس الخصوصيه واني استلمتني اسراء  تذب حجي وبس تريد تتعارك ها خاف تكولون وين جانت اسراء ذيج الفتره..

سافرت ويه صديقته فتره ورجعت ورجع شلعان الكلب وياهه.. اول ما اجت بس شافتني كالت اهوو هاي العله هم بعده شوكت نخلص منج.

فاطمه.. مو جنه مرتاحين منج شجابج.
اسراء.. شوف الصلفه وهم ترد؟ الله ياخذج كون تف عليج وعلى خلقتج.
اجه عمي ويه هدى كال هاي شبيجن شسالفه.. وكالعاده اسراء تجذب وتطلع هيه المظلومه
اسراء.. بابا ولله بس اجيت تكلي شجابج من جنه مرتاحين منج رجعي منين ماجيتي. ترضاه ترضاه عليه يابه.
فاطمه انتظرت هدى توكف وياي كالعاده لان محد يصدكني وحدي بس شو راحت بكل الغرفه حتى ماباوعت بوجهي.

.ظليت صافنه هاي شبيه.. صاح عمي
-فااطمه مو احجي وياج صدك هيج كايله لاسراء.

يتبع...

-فااطمه مو احجي وياج صدك هيج كايله لاسراء.
-عمو ولله تجذب ولله اصلا هي تكرهني ليش مصدك.

-مع الاسف متوقعتج هيج ابد بعد تربية امج شنتظر منج روحي من وجهي شو دمشي.
اسراء تباوعلي وابتسامة بوجهه اني اختنكت ودمعت عيوني من راح عمي اجت من يمي وتكول.

-هه حيل تستاهلين انتظر اليوم الي تطلعين بي من بيتنه احنه منلفي ساقاطات.

اني هنا فار دمي ماعرف شلون طلعت مني وكلته واني ابجي انتو كلكم ظاالمين كلكم امي وابويه وعمامي وعماتي وخالتي الي أخذت اخواني ومافكرت بحالي كلكم ظالمين لو معتبريني يتيمه مشرده ماجان هيج عاملتوني بس محتقريني لأبعد الحدود

حسبي الله ونعم الوكيل ماعندي غيره.
شفت اسراء ظلت صافنه اني درت وجهي ومشيت صاحتلي تعاي شو تعاي اني مجاوبته

فتحت باب الغرفه ودخلت ابجي رفعت راسي اريد احجي ويه هدى بس هي تفهمني لكيته هي هم تبجي

سألته شبيج تباوعلي مثل الحاقده ودارت وجهه عني.
-هدى مابقيتي بس انتي تتغيرين عليه لج شبيج.
-رجاااءا فاطمه انتي بالذات ماريدج تحجين وياي حتى لو بس اليوم.

-اني هنا صحت تره ماكو هيج شي بالبدايه عمي نوب انتي واسراء من أساسه كارهتني بس انتو شبيكم ويايه.

-اكلج تره صحيح كلام اسراء بس اني مرات استخطيج.

-انتي معقوله هدى لو أتخيل (صحت واني ابجي واشهك)ولج من شوكت من شوكت... ولج ماكلتي من الأول اني هم اكرهج ولكم خافو ربكم تره اكبر شي عد الله دمعة اليتيم والمظلوم واني ثنينهن بيه...

-هففف دسكتي انتي بيا حال تره روحي طالعه بس سدي حلكج..

-وليش استغرب هو حظي ماكعد ويه اهلي نوب بيت عمي هه.

-يوووه وتالي مسكتين صوتج يزعجني اصلاا وجودج كله يزعجني مو جنت وحدي بالغرفة شجابج.

كامت هدى وطلعت من الغرفه وسدت الباب حيل اني كعدت ابجي مدري على حظي مدري على تعاملهم الي تبدل برمشة عين وكأنما
جانو يمثلون وخلصو الثمثيل ماصدكت عشت ايام حلوه ماخلصت نص سنه ورجعت لشعور الوحده محد يكدر يحس بشعور من ماعندي اهل وغير مرغوب بيه وين ما اروح وشبه مشرده وياهو اليجي يعيرني بأمي.

.. طلعت اغسل وجهي واروح أصلي بس جانو كلهم بالصالة كاعدين واني يم المغسله الي يم المطبخ واسمعهم من المطبخ يحجون.

اسراء.. هسه هاي شوكت نخلص منه تره وربي مطايقته.
عمي أبو حسين.. هسه عساس اني الي طايقه ولله كلما اشوفه اتذكر امه وكأنما عايش ويه قاتلة اخويه.
مرت عمي ام حسين.. تره هي طفله من صار كل هذا وماله ذنب بشي خطيه حرام عليكم دمعة اليتيم تشور.

هدى كامت تبجي.. ماما ماريده بالبيت ماريده نطيه لكرار وخلصينه منها.

اسراء.. ياكرار بس لا ابن خالي ليش بس لا خاطبه واني مادري.

هدى.. اي بس تكول ماريد ازوج عندي أحلام وكذا.

عمي.. هسه يله كافي كافي تزوج كرار وخلص سدة الموضوع وهاي الفتره لحد يسوي مشاكل وياه وخاصة انتي اسراء تره ادري بيج جذابه بس اني اصلا اريد حجه علمود احجي عليه.

مرت عمي .. تره حرام الي جاي تسو اني مالي علاقه ما اتحمل هيج ذنب ما أجبر البنيه ع الزواج اذا متريد خلص هيه مو إجبار اكول لاخويه البنيه مامستعده.

اسراء.. يمه راح صير عشرين سنه يمكن شوكت تزوج لعد.

مرت عمي.. انتي مالج علاقه لتدخين.
...

¤...........................

فاطمه...
سمعت الحجي لهنا وبعد مااتحمل رحت على فراشي اشيل الكتب واركعه اشمر اي شي يمي ليش ليش هيج يصير بيه شنو مو من حقي اعيش اذا مو من حقي أيش نولدت اصلا اموت ولا اعيش بذل هيج بس مرت عمي شويه كلامه خله بيه امل بقيت ابجي واشهك كلبي يوجعني ذكرت أحلامي اصير دكتورة جراحه محترفه بمهنتي واساعد الناس وافتح عياده خاصه لذوي الاحتياجات الخاصه واصير دكتورة مشهوره واشتغل بضمير

مو مثل الأطباء الي همهم الفلوس شكد حلو لو تحققن احلامي والله بسيطه اصلا هذا حقي المفروض مو امنيه اي شخص بهل الوقت عنده طموح ويسعى اله بس اني حظي مكاعد حتى مو من حقي اصير مثل ما اريد.

وره شويه دخلت هدى باوعتلي ودارت وجهه.

.......................... ☆........................
هدى...
شفت فاطمه تبجي نقهرت عليه ولله ليش اني هيج كرهته هف.

فتحت الموبايل شفت احنه يوم 18 يعني بعد عشرة ايام عيد ميلاده ياء ولله نسيت خل احجي ويه حسين أذكره بلكت تفرح شويه وتنسى.

خابرت حسين ميرد هف صدك هو انتقل للحشد الشعبي وعاف الجيش من قبل 3 اشهر يمكن وصار يتأخر أكثر يله ينزل يااا عزه بس لا يعبر عيد ميلاده ومينزل لا خرب اتصلت عليه 5 مرات ميجاوب عفت الموبايل وكمت وره شويه فتحته لكيته متصل عليه مره وحده رجعت اتصلت جاوبني..

حسين.. الوو ها شتردين..
-دسلم بالأول كول شلونج..
-اكلج تره اني بنص الجنود وشويه ويصير الهجوم احجي بسرعه ماعندي وكت..
-نسيت عيد ميلاد فاطمه.. ولك بعد 10 ايام ومتدري يمكن كرار خطبها يمكن تزوج خطيه شتريله موبايل قبل لتروح اليوم بجيت هواي اهلي ميردوها واني هم مدري ليش كرهته..

-لحظه لحظه..شصاير واني مادري.. بس لا جابريها ع الزواج..
-لا لا بس اسراء مثل متعرف تتعارك وتشمر حجي وابويه مصدكه هل مره وصيح عليه واني هم جنت ضايجه ماسمعته..

-اكلج هاي ديصيحولي يمكن راح يبدي الهجوم سمعيني.. كولي لعلاء.. حسين يريد يشتري موبايل جديد وخل يشتري ونطيه لفاطمه اذا اني ما اجيت يعني اتأخر..

-وليش ما اكله الموبايل لفاطمه..

-ولج يكرهه يموت منه اصلا هو راد يكتله بيوم مات عمي بس كوه هدئت أعصابه.. يله اني رايح ماكو وكت مع السلامه..

-اوك اوك مع السلامه..
سديت الخط وكعدت افكر بس كلما اتذكر كلام حازم يفور دمي واتعصب واحاول أقنع روحي هيه ماله علاقه بل يصير...

يتبع...

الم تسمعو بقول الله (ان الله مع الصابرين ).

الم تسمعو بقوله (ولسوف يعطيك ربك فترضى).

الم تسمع بقوله (وبشر الصابرين).

بعد كل ضيق فرج وان طال
ولكل بدايه صعبه نهايه اجمل...

يكفينا انه وعد من الله (ان مع العسر يسرا )

................................................
البارت 12
فاطمه...
كعدتني هدى وكت المغرب شويه ويأذن اني مو من عادتي انام هيج وكت بس يمكن بجيت وتعبت ونمت...

. ذكرت الي صار اليوم هففف هسه اني شسوي؟ مال ابقى هنا واعيش بالذل لا ولله مستحيل..

بس شسوي؟ فكرت فكرت نوب ذكرت خالتي الي بتركيا صح تكره عمامي واحتمال تكرهني هم هه المهم ما اعتقد اذا اكلله راح يزوجوني غصب تعوفني يمهم لان هو هذا نفسه الي صار  لأمي...

سرحت بافكاري... وجان تكلي هدى... ها متكومين
فاطمه... اي اي هسه اكوم..
كما غسلت وجهي وصليت خلصت فكرت شسوي هسه وأوصل لخالتي!!
كلت اكول لمرت عمي حبابه بعدين تراجعت كلت مو وكته يمكن اكو حل احسن اهووو يا حل مثلا ..

. مدري شلون اجت بالي أوافق على كرار واخلي يحبني نوب اشرط عليه اكمل دراستي حتى لو نتزوج وهو اكيد راح يوافق لان يحبني نوب اصير خبيثة وانتقم منهم واحد واحد..

. ضحكت على افكاري بس قتنعت ولله ههه ماكو غير حل حتى خالتي شراح تسويلي مثلا تاخذني لتركيا ماريد.

.. تشتكي عليهم بأي حقق!! وبعدين هاي اذا تحبني... هه أما اذا تكرهني مثل ما اعرف يمكن متباوع بوجهي.

كلت هسه اسكت واذا جابو طاري الزواج اكول اني موافقه.

......................... ♡........................
هدى...
جان كل همي حازم وشكله واذا كتله مخطوبه شراح يسوي التفكير اكل راسي هففف..

من وصلنه للدرس كلشي مافتهمت بس مركزه على حازم وارتب بالحجي واتخيل شيجاوبني وارجع اجاوبه وسويت محادثه شطوله وشعرضه براسي ومنتظره بس يخلص حتى احجي وياه...

وصدك من خلص مصدكت روحي كمت واباوعله بنظره وكأنما اكله عندي حجي وياك... وصدك شويه واجاني كال تعالي شصار احجيلي...

-والله ماعرف شكلك بس فاطمه مخطوبه..
هو ظل صافن ووجهه ينطي ألوان بعدين كال...
-اذا مخطوبه ليش مكتيلي البارحه..
-مو جانت ما كايله موافقه لو لا.. بس اليوم وافقت ومن كتله عليك كالت لا اني احب كرار الي هو خطيبها...

ضرب ايده بالحايط حيل وعيونه صارت حمر بعدين راد يكول شي وسكت وكال تمام تمام شكرا.. وطلع..

اني اباوعله وهو يطلع وابجي ليش ليش اني متحبني لعد ليش طاحظج فاطمه كما اشهك ودخلت

بس مسحت دموعي بسرعه ورحت حتى ليكلي ابويه ليش تبجين..
.............................. ☆..................
فاطمه...
كالعاده اتصرف طبيعي وصدك صار مثل متوقعت..

جنت كاعده وحدي بالغرفة اقره ودخلت مرت عمي.. كالت فطومه اريد احجي وياج.. اني عرفته ع شنو تقصد كتله اي خاله تفضلي.. كولي...

-انتي تدرين كرار ابن اخوي يريدج.. مو..

-اي

-اني بالنسبة الي ما اجبرج بكيفج اذا راضيه اكول اله واذا ما راضيه هم اكول...
-اي خاله.. موافقه..

ظلت صافنه المره متعجبه  وابتسمت.. وكالت فكري زين لتسرعين..

-خاله فكرت زين ولله وموافقة..
-ع راحتج حبيبتي.. هاي هيه مثل متردين... وطلعت...

ظليت كاعده افكر... هف هسه صدك اني ليش أسرعت... اهوو هم رجعنه..  هو هذا اخر حل ماكو غيره..

تعبت من التفكير آخر شي درت وجهي ونمت...
صار النوم هو الوسيلة الوحيده للهروب من التفكير المؤذي...

.......................................................
تسريع الأحداث المهمه..
مرت الايام طبيعي.. حازم تقبل الوضع وتقريبا كام ينسى رغم هو مو سهل تنسى شخص تحبه وبنيت كل أحلامك وياه بس ماكو خيار ثاني.

.. وهدى بقت بتناقضه ساعه تحب فاطمه وتعامله بلطف وساعه تنكلب عليه وتحقد بس هي مانست حازم لان لهسه عدهه امل يكون يحبه... فاطمه بعده على خطته ولما انو قرب عيد ميلاده قررو تصير الخطوبه بعيد ميلاده... هدى هم راحت ومثل ما اتفقت ويه حسين وأشارت الموبايل فاطمه حتى تصير هم هديه لعيد ميلاده وهم لخطوبته... وصارت خطوبة فاطمه وبهذا اليوم فاطمه جانت شبه فرحانه.. بأنو راح تنفذ مخططه بس ضايجه لان هيه ماجان باله زواج ومو هذا الي تريده... بس بعد تحت حكم الظروف ينجبر الإنسان يتخلى عن أشياء ما أتخيل بيوم من الايام يتركه....
....................................................... بيوم الخطوبه...

صارت الخطوبه بين كرار لان كلش جبير وهواي ناس اجو خاصة من أهل كرار...
كان الكل يباوع للملاك الي كاعد وهي فاطمه جانت لابسه فستان ضيق وطويل ولونه أخضر غامق وهي عيونه خضر طلعت تجنن...

فاطمه...
كرار الوكت كله مانزل عينه مني.. واني جنت ابتسمله وأبين انو اني فرحانه حيل وأحبه وهاي جزء من خطتي..

. طبعا اني ما عندي نية سوء وياه.. بس أريده يحبني واستخدمه حتى اكمل دراسه واحقق احلامي لان معندي غير حل...

ومستحيل أتقبل اعيش بذل يم عمي بعد ابد ابد... من خلصت الخطوبه و كعدنه اني وكرار وحدنه...

لزم أيدي وكال شطالعه اليوم احلى من نانسي.. ضحكت وكتله حبيبي اليوم خليه بلا رومانسيه بس اتعرف عليك اكثر...
ضحك وكال بكيفج بقينه نسولف لحد ما تعب هو وكال كاافي متعبين من الحجي انتي.. ضحكت وكتله لا شخسرانه ايد رجل..

هو بس احجي.. ضحك وكال يله حبيبتي اني طالع اشوفج غير مره... وطلع... طلعت وراه  الكل يسألني شصار شصار اني مالي خلك اجاوب عبالهم متكبره.. شيحسوبهه خل يحسبوه... بحالهم اني.

ومرت الايام عادي نفس الشي وبصراحه اذا اكلكم بديت احبه لتكرار مصدكون جنت اسولفله كلشي مريت بيه وهو جان يسمعني بدون ملل ويواسيني تمنيت اعرفه من زمان بس صار الي صار..

. هو اصلا ما اكلكم يحبني يعشقني يموت عليه... اذا تأخرت شويه بالرد على مكالمته لو رسالته يتخبل..

جان كلشي تمام إلى أن يوم من الايام اجت هدى تبجي بحركه واني جنت اخابر  كرار.

.. اسئلها شبيج ولج شبيج متجاوبني وتشهك واحجي ويه روحها خوفتني..
يتبع...

بداية..
اسفه على كل تأخير مني بالقصه بس ولله ظروفي صعبه بس الله يعرف ورغم هذا حاولت اكمله واخلصه الكم بأسرع وقت... حبايبي
..............................................
ها اني اعلنت النهايه وبات قلمي ينسحب بهدوء تاركا أثرا في قلوبكم يسعدني بتعب.. ها هي آخر سطوري التي طالما انتظرتموها ها هي النهايه... لمعاناة فتاة لحكاية نقشت الكثير في نفوسنا....

................................................ البارت 13 والأخير.
دوما بعد الصبر اشياء جميله.. كلما صعبت ظروفنا هذا تلميح بأن الفرج اجمل بأضعاف صعوبة ما مررنا به..

....................................................... فاطمه...
رحت لهدى كتله شبيج ولج ليش تبجين.. متجاوبني.. يالله هاي شبيها.. احجي وياهه متجاوب بعدين صاحت بوجهي كله منج كله بسببج.. نوب كالت انتي شلج علاقه.. لا انتي مالج ذنب..

.. هففف... اني كتله ولج شبيج تخبلتي احجي شبيج.. كالت شحجيلج واحد ثنين هنه.. كتله احجي شعندج احجي..
كالت..
-يعني صدكين لو اكلج حازم يحبج واني كتله مخطوبه قبل لاتوافقين... نوب هو ضاج وصار كئيب كلش حتى ميدرس عدل واليوم سمعته خاطب..

ظليت صافنه هاي شتحجي..
-لج انتي عاقله.. مخبله صدك تحجين ولج ليش ماكتيلي ليش هيج تعذبين روحج..

-اي هو كله من ورايه اني رسمت أحلام وزرعت امل ع الفاضي اني ثوله ماقتنعت من البدايه انو هو مو الي ولا يحبني..

-هسه كافي تحجين على روحج كافي تبجين مدام هو مو الج يعني ميفيدج يعني اكو احسن منه ينتظرج يله كومي غسلي وجهج وارتاحي متسوه الي ميريدج لتريدي..

.
كامت غسلت وجهه واجت كعدت بالغرفه بعدين كمزت وضحكت كالت نسيت شي لحظه شويه واجي.

.. وره شويه دكت الباب وكالت عليج القرآن غمضي عينج ولتفتحيه اله اكلج كتله تمام.. وصدك غمضت حسيت بيه طبت وسدا الباب وكالت كولي والله ما اشوف.. وفتحي ايدج..

كتله تمام ولله مدا اشوف... ما احس اله شي على ايدي هيج مثل مستطيل مدري مربعكتله شنو شنو هذا افتح عيني حبابه... كالت فتحي..

فتحت عيني وشفت موبايل ابيض وحاطتله كفر وردي.. يمااا لج هذا شنو المن...
-الج يعني المن
-يعني يعني هذا الموبايل الي يعني مالتي..
-اي اي كبر ممصدكه.
اجيت حظنته حيل ودمعت عيني من الفرح كتله شكرااا كلش كلش لج اموت عليج يا  احلى اخت بالدنياااا.... ضحكت وكالت اني شتريته بس بفلوس حسين..
-عليج اللهخطيه هواي فلوسه.. ليش ولج كتيله..
-نجبي عتبريه هديه مال زواجج وسكتي..
-شكرا شكرا ماعرف شكلج من الفرح رح ابجي..
-ههههه
-شوكت ينزل اجازه.
- بعد أسبوع.
-اهاا حتى اشكره.

............................. ☆....................
فاطمه...
خلال الفتره الي ماقبل نزول حسين للأجازة..

صارت هواي أحداث مهمه راح اختصره... وأذكر مره من المرات جنت طالعه ويه حبيبي...

ومن رجعنه وداني لبيته كال بس انتظري شويه اريد اطلع جنسيتي عندي شغل بيه.. بقيت بالسياره ماقبل كال هو هذا بيتج بعد جم يوم من شنو مستحيه ضحكت ونزلت من دخلت امه رحبت بيه ترحيب حلو.. كلش تحبني بس خواته يباوعنلي بنظرات تخوف وحده بيهن تباوعلي من فوك ليجوه وفاتحه حلكه وتهز بيده خوفتني جنت كاعده بالصالة قدمولي عصير وره شويه من طلعت ام كرار... اجت هي هاي الخوفتني تباوعلي من فوك ليجوه.

. يمكن هي هاي الصغيره يعني أصغر وحده بيهن مبينه من شكله... اجت جرتني من أيدي يااا هاي شبيه...

اخذتني على جهه وتجر بيدي حيل تكلي سمعي لج انتي متصيرين لاخويه فهمتي وتضرب برأسي بأصبعه وتكول دخلي هل حجي براسج.. انتي متصيرين لاخويه فهمتي فهمتيي..

. واذا متنسحبين وتعوفيه بحاله صدكي مراح ترتاحين ولا راح يصير خير.... ع فكره اني صديقت اسراء كلش وكلتلي ع ماضيج الأسود وعمايل امج...

اني وجهي صار اصفر وردت احجي كلتلي اششس ورجعت جرتني بمكان بيه ام كرار حتى اسكت وما اجاوبه وصدك صار هيج..

.. فار دمي بودي هيج الزمه املخه أشرب من دمه هل خايسه هاي..

.. طلع كرار كال طلعي لسياره واني وراج سلمت ودا اطلع اجت هاي البنيه غمزتلي وضحكت وهمست من يمي فكري زين اذا تردين سلامتج هه.

... اني كوه لازمه اعصابي ومتحمله بسبب وجودي بينهم ماريد ابين شي من طلعنه ع سياره جنت ضايجه وكرار لاحظ هل شي قبل ليحجي سبقته بالكلام وكتله هاي اختك الي جانت واكفه يم الباب ام الشعر الأصفر شنو اسمه...

-كال اسمه منال.. وبعدين ليش صاير شي كايلتلج شي...
-لا لا.. ماكو شي
-فاطمه انتي خطيبتي وبعد جم يوم تصيرين زوجتي ماكو أسرار بينه.. تمام.
فكرت اكوله لان مهما حاولت اخفي تاليتي اكوله... ف كتله كلشي كالته منال وتهديداته الي ماعرف غايته منهن شنو...
-هه مالج علاقه بيها حياتي ... هاي بوخه ودوخه بس لسان بس لو تجين للحقيقه كلشي ما تعرف فاهيه وفطيره ما أدافع عنه بس اختي ومعاشره واعرفه... انتي خوفج من اسراء هاي راس البله يمكن هي دافعته ومسمعته حجي.. لان اعرفه منال بالاول جانت فرحانه كلش وكالت حبيته لخطيبتك حلوه ودمه عسل...
- ابتسمت ودرت وجهي..
-هه خجلت
-اكلك شوكت نوصل.
-تغيرين الموضوع مو..
-لا ولله تأخرنه رح يصير المغرب.وعندي دروس
-هاي وصلنه شوفي ذاك هو بيت عمي.
ورع دقيقتين وصلنه نزلت ونزل هو هم سلم عليهم وطلع...
طبعا هواي صار حجي وره هل الحادثه وصدك طلعت منال فقيره وحبابه بس هاي الحيه اسراء محشيه راسه بالحجي والكال والكلت يعني حتى من اريد اطلع وارتاح تخرب عليه شنو من بشر حسبي الله ونعم الوكيل..

تسريع الأحداث***
صار زواجنه كلش حلو بقاعة جبيره كلش ماخلو مكان ماراحوله كلش فرحت وجان صدك صدك احلى يوم بحياتي وكته جان شته والجو يخبل..

. عشت احلى ايامي ويه حبيبي وروحي كرار... صح جنت هواي هواي أتعرض لمضايقات مزعجه من خواته وخاصتن هاي الجبيره طلعت نسخه من اسراء اخاف خلصت من اسراء الي بيت عمي هاي بعد انكس...

وجنت دائما ابجي من وراه واسكت وما اكول لكرار حتى لتصير مشاكل من ورايه... ومنال طلعت مثل ما كال كرار فطيره  وبس لسان

ومرات تحقر ويايه وتذب حجي لان خواته يدفعنه عليه..

. بقيت على هل الوضع متحمله لحد ما مرت شهرين  وصار عمري 19  وبالسادس نوب طلعت حامل خرب شبعت بجي من عرفت وكرار فرحان والكل فرحانين بس اني ابجي لان سادس واريد اطلع معدل عالي لكلية الطب ويني وين الحمل والولادة..

. بعدين صبرني وقنعني كرار انو هذا امتحان من الله و ميصير اعترض على حكم الله صدك قتنعت وفرحت بس شويه ضوجه ويه فرحتي.

.. طلعنه لغير بيت بعد ما حملت ومنال تزوجت وقادر الي يصير اخو كرار الاصغر بقه للبيت ..

بس ولله عانيت بذيج السنه معاناة بس الله يدري بيها اسهر لل 2 اقره ومن كثر ما ادوخ بين القرايه والألم كل شويه اتقيئ ومرات ما اشوف زين وشبه يغمى عليه وأظل لازمه بالحيطان والدوخه لازمتني هاي بالليل

  اما بالنهار وجع الراس الله يجفيكم شره مجربين شعور من تحس عيونك تريد تطلع من الوجع وراسك ميتحمل اي فكره من الوجع هو هيج ورغم كل هذا ماكلت ولا راح اكول لكرار خليه هو تعبان وظهره مكسور بالشغل اني اتحمل وحدي احسن...

جبت بنهاية شهر ال 11 جنت تعبانه كلش كلش لدرجة مابيه حيل أجر نفس صرخت صريخ طلعت كل الألم الي جنت متحملته حتى الأطباء خافو كالو اخاف بيه شي جنت اسمع واشوف بتشويش و ماكدر احجي المهم طلعت سلامات وشفت ابني نجوحي حبيبي سميته نجاح لان صدك جان امتحان ثاني الي إضافة لامتحاناتي المدرسيه وطلعت معدل 94 نقبلت طب أسنان عكس الي جنت أتمناه كلش نقهرت لان ماكدرت أحقق حلمي واصير دكتورة جراحه  بس فرحت انو كدرت أحقق هيج إنجاز بهيج ظروف والحمد لله على كل حال

بس المصيبه الوكعت على راسي طلع ابني مريض بالقلب يعني عنده فتحه بالقلب ومرات كوه يتنفس سوده عليه بس هواي اهتمله وما اتعبه بس خايفه لو توظفت شلون ادبرهه هففف الله كريم..

. وهدى تزوجت مدرس  وأخذه خارج العراق بتركيا هناك أهله ساكنين.. ههه الله عوضه بأحسن من حازم سبحانك ربي مينسى عبده...

وحسين تزوج وشكرته بذاك اليوم  الي جاب بيه الموبايل اني وكرار كلش شكرناه وكرار حاول يرجعه يكول اني اشتريلج بس حسين ماقبل كال عيب تردون هديتي...

وصدك تصوب خطيه وهسه كوه يمشي وكسر برجله قوي كلش لا حول ولاقوه إلا بالله عاد همزين ما مات لان مرته خطيه حامل منو اله.

وصح حياتي حاليا صعبه لان جامعه وأصعب من المدارس بس وجود نجاح وكرار بحياتي كافي انو يخفي كل هل تعب وأن كان تربية ابني و شغل البيت صعبين بس عادي هي الدنيا كله تعب..

. أكثر شي قهرني ولهسه انقهر كلما اتذكره هو اخواني الي سجلتهم خالتي بأسمه واسم زوجه ومن يكبرون شلون يعرفون أمهم الحقيقيه وقصته وابوهم واختهم وشصار بيه نترك الجواب للأيام والاقدار.....
كانت هذه نهاية القصه لكنها ليست نهاية المطاف.
اني الكاتبه مريم وفاطمة صاحبة القصه نقدم الشكر لكل من تابعها ويانه وعاش لحظاته وتحمس اله مثل ما احنه متحمسين نكملها نقدم شكر لكل عين جميله تقرأ بهل اللحظه ودمعت عينه على موقف لو تأثر بيه نشكركم كلكم لوقتكم الثمين ومتابعتكم.
رسالتي الكم من القصه هي انو ماتفقدون الامل مهما قست ظروفكم وساء حالكم لان الله موجود والصابرين عند الله اجرهم عظيم "فاطمه" مثال لواقع نعيشه مثال للأيتام الي يعانون من معامله سيئه بدون مراعاة مشاعرهم عانت لمدة 9 سنوات وممكن اي شخص بمكانه من اصحاب النفوس الضعيفة والي يعانون قلة الإيمان ينتحرون من اول عثره تره احنه بالدنيا يعني لتنتظرون انو نعيش حياتنه كلها سعاده وبخير لان بإختصار الدنيا مكان مؤقت الله يختبر بيه صبرنا حسب طاقاتنا فلتستسلمون من اول امتحان تفشلون لا ابد.... الإمام علي عليه السلام يكول.. الدنـيٱ دار ممر لا دار مقر والنـاس فيهـا رجلان: رجل بـاع فيهـا نفسة فـٲوبقها ورجل ابتـاع نفسـة فٲعتنقهـا
اسفه ع الاطاله بس اعرف انو كل واحد بينا عنده هم يشغل باله واحتمال اذكره من قره كلامي اتمنى متستلم لان مهما ساءت حياتك هي أمنية لإنسان حالته أسوء منك..
نورتوني كلكم فردا فردا يوردات.